60 Johr un ka bißje mied

Es Baumann Zenzi werd 60 Johr alt. Wer is'n des, werre die meiste froe. Die ältre Leit aus Schag wisse's bestimmt un mer Jingre meechte's aah wisse, wann im 54er de Graf Helmut die Zenzi, die mit ehrem scheene Mädchenome Franziska Krems ghaaß hot, net gheirat hätt. So haaßt se halt Franziska Graf un jetz wisse aah bestimmt vill alte un junge Schwowe - un net norr die Schager -, daß se dee Nome sehr wohl kenne, un zwar aus der BANATER POST odder aus'm DONAUSCHWABE.

Foto aus dem Buch
   Notre-Dame im Banat -
Beiträge zur Geschichte
der Klosterschulen der
 Armen Schulschwestern
von unserer Lieben Frau
(1858 - 1948)

Die Frau Graf, wie Franziska Graf in Ingolstadt un Umgebung vun de Landsleit genennt werd, find immer die richtiche Wärter iwer die Schwoweveranstaltunge odder iwer dee oone un annre Jubilar. Des sin nie truckne Berichte, was die Schager Gastwirtsenkelin un Postmeisterintochter, die wu im Temeswarer Gymnasium in der Notre-Dame-Schul ehre Hochdeitsch gschliff hot, unser schwowischer Zeitung onvertraut. Do speert merr immer die notwennich Anteilnahme am Geschehen un's wu annerscht oft vermißte Mitfiele mit de Leit, die wu noch etwas uf die Fieß stelle. De Frau Graf ehre Zeile kumme net aus'me komerzorienteerte Journalisteverstand. Die Fraa schreibt einfach, was ehre Herz ehr dikteert.

Aus'm Ingolstädter Kreisverband vun der Landsmannschaft der Banater Schwaben is Franziska Graf iwerhaupt net wegzudenke. Do muß merr sich mol vorstelle, wie des zugeht, wann 20 selbstbewußte Männer in der Vorstandssitzung in ehrer schwowischer Streitkultur debateere. Do meecht manchesmol nemol de Placido Domingo mit seim Fortissimo dorchkumme. Awwer die Frau Graf, die schafft des mit leiser, awwer bestimmt un iwerzeujend klingender Stimm. Un meistens find die Männerrunde noh aah schnell zu'me akzeptable Kompromiß.

Asso winsche mer ... Naa, des muß ich noch loss werre: Nateerlich wär's mer nie un nimmer ingfall, daß die Frau Graf am 18. Dezember "schun" 60 Johr alt werre kännt. Awwer Leit, die wu Bicher schreiwe, känne ehre Biographie net versteckle, weil so etwas nun mol in e onstänniches Buch gheert. Un so e Buch, des wu unser Lewe im Banat der Ewigkeit iwerloßt, hot aah die Franziska Graf rausgebrung. Es haaßt schlicht un einfach Schag an der Temesch un is e echtes Gemeinschaftswerk vun vill Schager Landsleit.

So wolle mer hoffe, daß mer der Frau Graf ehre Artikle, ergänzt mit de Bilder vun ehrem Helmut, noch oft lese un siehn känne. Weiterhin vill un guti Inspiration un die Gsundheit forr die Zukunft ! Des is unser aller - die wu Frau Franziska Graf vum Siehn, Heere un Lese kenne - Glückwunsch zum 60ste.

Potche Toni

aus BANATER POST, München, 10. Dezember 1993