Liewer mit de Fieß uf der Erd … (2)

 E schwowischi Betrachtung in zwaa Taaler iwer e Sanktannaer Kulturleistung un iwer mei Verhältnis zu ooner Sängerin aus Sanktjakobi 

E banatschwowischi Transzendenz

Leit, wisst der, was e Fan is? Forr die, wu ‘s noch net wisse: Fan sein haaßt, zu jemand halle, wann ‘s aah e Putsche Geld kost odder merr sich in Reen un Schnee die Krepeer zammraft odder merr sich mit der eigni Familie onleet. Es is ganz gleich, ob ‘s sich do um de Lieblingsfotballist, de Lieblingsschauspiller odder die Lieblingssängerin handelt. 

Ich sin aah e Fan, e Mayen-Fan. Jo wirklich, so haaßt mei weibliches un singendes Idol: Mayen. Wann ‘s Mayen irgendwu uf dere Welt odder in irgendoom Fernsehprogramm uftret, sin ich dabei. Mei ganzi Urlaabs- un Freischichtplanung richt sich norr noh em Mayen seine Auftritte. Der Mann is fruckt, werd Dehr jetz soon, un mei Antwort kann norr sein: Ich sin halt e Fan, un net akkarwas forr e Fan, sondern e Mayen-Fan; un des verleit mer die Fähigkeit, mei irdisches Bewusstsein im Allgemeine un mei Alterswahrnehmung im Besondre zu verlosse.

In ‘re Weihnachtszeit hun ich mol ooni vun de schennste Mayen-Erscheinunge ghat, in der ARD. Jetzt waaß ich, wie ‘s de Kinn vun Fatima selmols gewen sein muss. Ich hun mei Herz im Hals gspeert schlon. So etwas prägt, Leit, des kann ich eich soon, un ‘s macht stärk. Kraft brauch ich aah, weil mei Weiwer lästre ganz scheen im Hinnergrund. „Schau Mutti, wie Papas Augen glänzen. Man könnte meinen, er wäre erst 20 Jahre alt“, hun ich mei Tochter in der Kich gheert soon. Ich hat mich selmols schun e bissje geärjert, awwer heit, jo, heit waaß ich meh, vill meh. Un ich sin meim Schicksal dankbar. Jetz sin ich mer ganz sicher: Ich gheer zu de Auserwählte.

In der Faschingszeit ware mei Fraa un ich im Kaufland inkaafe, un weil ich ‘s net so mi ‘m Einkaufskorbfille hun, sin ich an de Zeidungsstand gang un hun mol e Zeitschrift mit Themen aus der „Szene der volkstümlichen Musik“ (des hot mit volksdümmlich nicks zu ton) dorchgschaut, weil do is jo mei Mayen oft drin. Un wirklich, ich hun ‘s funn, es Mayen, scheen farwich un mi ‘me lange Interview dabei. Leit, glaabt ‘s mer, im Himmel kann ‘s net schenner sein wie selmols am Zeidungsstand im Kaufland. Ich hun nemol uf de Preis gschaut un die Zeitschrift glei mitgholl. Mei Fraa hot an der Kassa e bissje bees gschaut, wie ich mit dem Heft onmascheert sin kumm, hot ‘s awwer noo doch gezahlt, weil ‘s jo sei Pappenheimer kennt, wie ‘s immer saat. 

Dahoom war ‘s noo aah neigeerich, mei ongetrautes Weibsbild, un unbarmherzich, wie ‘s schun is, wann ‘s um mei wankelmiedichi Seel geht, is ‘m net es eerscht em Mayen sei scheeni schwarzi Frisur odder des bezaubernd Klaad ufgfall, sondern etwas ganz annres. Uf der Mayen-Seit war e „Steckbrief“ un in dem war unner anrem zu lese: Name: Mayen, Geburtstag: 1. April 1966.

 „Was“, hot mei bessri Helft gsaat, „e 66er? Die Fraa? Niemols!“

Eifersucht, hun ich mer verächtlich gedenkt. Awwer e bißje gewormt hot ‘s mich doch, un wie mei Aldi net bei der Heck war, sin ich zrick ins Kaufland gfahr un hun mer annre Zeitschrifte aah noch ongschaut. Iwerall war‘s Mayen gleich alt un mei Herz war uf ‘m Platz.

E Wuch druf sin ich a ‘me Freitachowed in die ESV-Halle gfahr, mei Tochter vum Handballtreening abholle. Dort hun ich zwaa junge Weiwer getroff, die wu aus Sanktjakobi stamme un aah uf ehre Mädcher gewart hun. Mer sin – wie des schun is, wann Schwoweleit sich treffe – glei iwer des oone un annre in die Redd kumm un irgendwann is aah de Nome Mayen gfall.

 „Jo, des kenn ich gut“, hot‘s Renate gsaat, „des war mit mer in der Schul. Des is aah e 61er.“

 „Was“, hun ich gfroot, „1961 gebor?“

 „Jo, sicher. Warum eigentlich net? Des is doch unser Landsmännin aus Sanktjakobi“, hot ‘s Amalie, des anner Weib, druf reageert.

Do hat ich plötzlich e Problem ghat. Leit, des soon ich eich. Etwas, wu schwer zu beschreiwe is, hot mich gepackt. Ich hun gspeert, daß ich hinner e tiefes, weltbewegendes Geheimnis kumm sin. Ungezählt sin mei schloflose Naachte, in dee wu ich norr gedenkt un gerechnt un nomol gedenkt hun, bis ich in so e transzedentale Zustand gfall sin, daß mei Fraa mich tachsiwer immer komischer ongschaut hot.

Ich sin sogar uf Indien, zu ‘me Guru gfahr un hun regelrecht gspeert, wie sich an mer alles ongfang hot zu verännre. Naachts hun ich lang in de Mond gschaut, un in de Sterne hun ich geles. E ganz außergeweehnlichi Bewußtseinsverännerung is in mer vorgang. Ich hun norr noch forr mei Geheimnis un sei Entschlisselung gelebt.

Un noo, in ooner Vollmondnaacht, fast so hell wie de Tach, is die Erleichtung in mich gfahr. Ich hun ‘s direkt gspeert un krien heit noch Gänsehaut, wann ich dron denk. Die Rätsellösung vun dem geheimnisvolle Geburtstach un aah vun meiner perseenlicher Verwandlung is aus ‘m Himmel kumm. De Wech nuff in die Ewichkeit war in seller Naacht so klor zu erkenne, daß mei Gedanke uf dem Wech gfloo sin, immer zrick, immer weider zrick in die Zeit … Ich hun schnell unner mei Koppekisse gegriff un des Interview un dee Steckbrief zum abertausendste Mol geles. Jo, do war die Erklärung, de Schlissl zum greeßte Geheimnis im zwatte Jahrtausend noh Christus.

Ich will ‘s eich verrode, liewe Landsleit, awwer norr eich. Meiner Fraa soon ich ‘s net. Die werd ‘s noch frieh genuch bemerke un an ehrem eigne Leib speere. In dem Interview saat es Mayen schwarz uf weiß gedruckt (des hot nicks mi ‘m Lieje wie gedruckt zu ton), dass es 1993 ehre eerschte Fernsehauftritt ghat hatt. Dass ich ‘s schun in der Fasching 1989 im ZDF siehn hun därfe, is norr ooni vun dee Transzendenzvorgänge, die sich in meim Unnerbewußtsein abgspillt hun.

Zwischen 1993 un 1998, dem Johr, in dem wu mei wunnersami Verwandlung ongfang hot, leije genau finef (5) Johr, un zwischen 1961 un 1966 leije aah finef Johr. Weil awwer net alle „Fachzeitschrifte“ de gleiche Fehler mache känne un weil die zwaa Sanktjakobier Weiwer ka Grund ghat hadde, mich onzulieje, kann norr Folgendes passeert sein un passeert noch immer: Grad so, wie die meiste Mensche uf dere Welt vun Johr zu Johr älter werre, so werd mei allerliebsti Lieblingssängerin seit 1993 vun Johr zu Johr jinger. Asso war mei Mayen im 98er nemmi 37, sondern norr meh 32 Johr alt.

Un wann ich do die wissenschaftlich Behauptung ufstell, daß net alle Mensche vun Johr zu Johr älter werre, noo hot des nicks mi ‘m Einstein seiner Relativitätstheorie zu ton, sondern norr mit der Transzendenz (das Überschreiten der Erfahrung, des Bewußtseins, des Diesseits), die wu in wahrhaftiche Mayen-Fans vorsichgeht. Merr muss norr fest , ganz fest, ohne die klennste Zweifle an alles, was iwer ‘s Mayen so dorch die Glotzkiste un Zeitschrifte geistert, glaawe.

Ich glaab! Jo, wirklich, so ehrlich wie selmols bei der Eerschtkommunion mit der rechts Hand uf der Brust un in der links Hand es Kerzlicht. Un ‘s helft! Ich merk ‘s deitlich, wann ich in de Spigl schau. Zwaa neie Hoor sin uf meiner Glatze ufgetaucht. Wie wäre die dort owwe gewachs, wann ich net aah seit 1993 vun Johr zu Johr jinger wär wor?

Do unlängst hun ich wedder vor ‘m Spigl gstann un hun versucht, mer e Scheitelfrisur zu mache. Des geht ganz gut: e Hoor links un des anner rechts. Jetz känne mei Weiwer lästre wie se wolle. Neilich hun ich gheert, wie mei Tochter hinner vorghallner Hand gsaat hot: „Mutti schau, jetzt wird der Papa langsam kindisch.“ des haaßt doch, dass ich mit meim Gfiehl richtich leij. Ich werr wie mei ongebetni allerliebsti Lieblingssängerin, mei Mayen aus Sanktjakobi, vun Johr zu Johr jinger.

Awwer, liewe Landsleit, wie gsaat, des bleibt unner uns, weil ich will eich zum Schluß doch noch e Geständnis mache. Ich hun mich in letzter Zeit schun paarmol dabei dewischt, daß ich mer aus meim Sohn seim CD-Ständer Scheiwe ufgeleet hun wie „Sexuality“ vun Legend B., „Luvstruck“ vun Southside Spinners, „Flying to the moon“ vun Piet Blank & Jaspa Jones un vill annre. Der gfallt mer schun ganz gut, der nei Sound. Was passeert awwer, wann ich ball norr meh „Schlof, Kindche, schlof, / Dei Vatter hiet die Schof“ heere will? Des gebt mer schun zu denke, drum moon ich, es wär vleicht doch besser, wann ich wie unser Sanktannaer Landsleit liewer mit de Fieß uf der Erd bleib, wie daß ich weider mit meiner alleliebster Lieblingssängerin aus Sanktjakobi mi ‘m Kopp dorch die Wolke spazeer.

Berns Toni

aus BANATER POST, München, 

20. September 1999