Letschter Lagebericht

Die großi „Pipatsch“-Kür um die belieteschti Banater Musichkapell is zu End

Bis zum Kürschluss han mir 182.798 Kupons for 61 Musichkapelle kriet / Alli Rekorde sin gebroch gin!

Alles vergeht, nix halt ewich … Die Summerferien sin rum, die Blätter were geel, un aach unser Pipatsch-Kür is an der Endstazion ankumm. Un wu’s „Punktum“ heescht, dort muß mer stehnbleiwe un Bilanz ziehe. Aso: Im ganze han mir 182.798 Kupons for 61 Musichkapelle im Banat un ausm Saxeland kriet. Sogar uf een „Pipatsch“-Kapell hat jemand e Massa Kupons ingschickt, nor wisse mir net, obs aach e Kapell mit dem Nome get! Wieviel dass die iwer 182.000 Kupons ausmache, kenne mir aach saan: Genau 78 Kilo wieviel de Simpl Mischko selwer uf die Wooch bringt! Un als Haufe sins net meh un net wenicher wie anerthalb Kubikmeter. Unser schwerschte Redakteer, de Pommersheim Seppi, hat sich uf die Kartonschachtle gstellt, for dass ke Luft drinbleibt. Awer ich will des Ganzi net in die Länge ziehe, ich weeß wie des is, wann mer uf die Folter gspannt werd, un grad desweje wer ich heit mitm End anfange, for des wu die Tausendi un Tausendi schwowischi Musichfreind wuchelang mit Scheer, Pickzeich, Pasta un Kuwerts gerackert han. Ich fang aso mitm Endklassament an:

1.	Hans Kaszner	Johrmark	42.382
2.	Matthias Loris	Johrmark	36.043
3.	Anni Hann	Temeschwar	22.106
4.	Peter Pohl	Neipetsch	16.953
5.	Rudi Hellner	Blumental	13.715
6.	Peter Zimmermann	Nitzkydorf	9.575
7.	Nikolaus Hubov	Lugosch	5.415
8.	Jakob Rieder	Billed	4.135
9.	Josef Bleiwerk	Wetschehaus	3.685
10.	Hans Griffaton	Großjetscha	3.614
11.	Hans Maly	Temeschwar	3.329
12.	Werner Maurer	Freidorf	2.622
13.	Herbert Lindner	Bakowa	2.603
14.	Hans Mayer	Semiklosch	1.751
15.	Nikolaus Hinkel	Tschanad	1.491
16.	Hans Klug	Detta	1.480
17.	Alois Berwanger	Rekasch	1.442
18.	Josef Stritt	Saderlach	1.254
19.	Karl Palmy	Uiwar	1.234
20.	Reinhard Scherer	Bruckenau	895
21.	Andreas Weber	Sanktanna	699
22.	Karl Zwick	Bakowa	631
23.	Martin Frombach	Lugosch	577
24.	Hans Schmitz	Sacklas	559
25.	Franz Müller	Darowa	392
26.	Matthias Tillschneider	Grawatz	340
27.	Nikolaus Meinhardt	Lenauheim	321
28.	Thomas Schmidt	Hatzfeld	280
29.	Erwin Schmalz	Neiarad	245
30.	Stefan Engel	Triebswetter	226
31.	Werner Merschbach	Grawatz	210
32.	Dieter Marx	Lenauheim	196
33.	Richard Flaschka	Kleenbetschkerek	194
34.	Herwig Lehmann	Bentschek	188
35.	Philipp Barth	Liebling	185
36.	Franz Huszar	Senlan	177
37.	Josef Lammert	Schanderhas	139
38.	Josef Blumm	Großjetscha	134
39.	Reinhardt Konyen	Arad	134
40.	Otto Kloos	Anina	133
41.	Eduard Kuhn	Tschakowa	130
42.	Josef Lutz	Rekasch	127
43.	Hans Graf	Hatzfeld	120
44.	Franz Crișan	Gottlob	105
45.	Martin Lutz	Rekasch	102
46.	Anton Hollich	Glogowatz	85
47.	Manfred Loris	Bruckenau	81
48.	„Pipatsch“-Kapelle	?	78
49.	Ludwig Mühlroth	Ollerhas	51
50.	Paul Rank	Wolfsberch	50
51.	Hans Klein	Karansebesch	40
52.	Josef Rausch	Uiwar	36
53.	Ferdinand Scherbauer	Karansebesch	35
54.	Karl Geiser	Sanktanna	30
55.	Matz Anselm	Bokschan	21
56.	Seppi Hollocker	Engelsbrunn	15
57.	Karl Heinz	Lowrin	4
58.	Hans Pier	Triebswetter	1
59.	Waldkapelle	Hermannstadt	1
60.	Wolf	Wojteg	1
61.	Werner Zippel	Bschinwa	1
	Total		182.798

Wie mers gsieht, han bal die Halbscheid vun alli Kupons die Johrmarker kriet. Mir alli wisse, daß die Johrmarker noch immer fleißichi Leit (net nor als Maurer, Zimmerleit un Handballspieler …) ware. Un wann die sich was in de Kopp gsetzt han, dann hats gheescht: „Net nohlosse!“ ʼs Resultat leit uf der Hand. Awer aach die anre kenne des iwer sich saan un mir in der Redaktion han kräftich in die Händ spauze misse. So zirka noh jede 25 Kupons. Un bei iwer 182.000 will des was bedeite! Do is eem die Gorgl trucke gin un net mol e Schluck Bier han mir uns vergunnt, weil „Dienscht is ewe Dienscht!“. Een Troscht han mir Sortierer un Zähler awer doch: Was mir versaamt han, des kenne mir noch nohholle, ich men beim Kapitel „Seel un Kehl“, was awer die Musichfreind beim Kuponinschicke versaamthan, des is was anres …

Vielleicht wird so mancher jetz denke: Wann antwort der mir uf mei Brief? Ich antwort alli: In dere Wuch han ich 458 Briefe kriet. Un wann ich nor die Nome vun die Schreiwer abdrucke meecht, dann wär e halwi Zeitungsseit net genuch derfor. Eem eenziche Kupon-Inschicker muß ich awer doch antworte. Des is de Kahles Fredy (Kowatschi). Weil do is die Situazion ganz spezial. Aso: Liewer Fredy, kumm so gschwind wie nor meeglich (du oder dei Motter) in die Redaktion, weil in der Ufregung un Eil hascht zammt mit die Kupons e arich wichtiches Familjeschriftstick im Kuwert mitgschickt. Un mir wille ʼs dir perseenlich zuruckgin, for daß mir dir aach de Kopp e bißl wäsche …

Was mir aus deni Briefe so im allgemeine rausghol han, sin die Kunschtatierunge: „Schad, daß die Kür zu End is!“, „Schad, daß die Kür net weiterlaaft!“, „Wann kummt die nächschti Kür?“ ezetera. Daß e guti Porzion „Lokalpatriotismus“ bei der Kür mitgspielt hat, des kenne un wille mir net leigne. Awer so is ewe de Mensch, dass er zu dem, was er hat, arich hale tut. Un weil des so menschlich is, misse mir alli zwei Aue zudricke, mir kenne ʼs  verstehe un aach verzeije umso meh, als wieʼs um unser schwowischi Landsleit geht. Noch meh: Mir tuns deni Leit hoch anrechne, daß sie mit Leib un Seel mitghal han, dass sie dorch dick un dinn gang wäre, for Kupons sammle for ihre Lieblingskapell. Und daß die Kuponzählung ehrlich war, des garantier ich un mei Kullegre mit unsrem Kopp un unsre weechi Fingre. Wers awer trotzdem net glaawe will, der derf in die Redaktion kumme un die anerthalb Kubikmeter Kupons nochmol sortiere un nohzähle.

Was noch zu berichte wär? Aso, daß ʼs Minich Anna (Temeschwar) un de Lindner Herbert (de Kapellmeister vun Bakowa) e arich „fairi Geste“ – wie des im Sport so scheen heescht – gemach han: Sie han for alli Musichkapelle, die wu an der Kür mitgemach han, een Kupon ausgstellt. Weil: „Gerechtichkeit kann mer net mache. Alli unser schwowischi Musichkapelle sin gut un gleich beliebt.“  Jo, so is des. Jedi Musich is in ihrer Art scheen, sogar die sinfonischi. Un bei unser Kür is ʼs jo net drum gang, welches die beschti Musichkapell is, mir han nor rausfine wille, ob unser Schwowe zu ihre Sitte un Breiche hale tun. Un mir mene, des is prima bewies gin! Verspielt hat derbei niemand, ʼs get nor Gewinner. Gewunn hat derbei in erschter Reih die Musich. Un des war jo im Grund ghol aach de Sinn un Zweck vun der „Pipatsch-Kür um die beliebteschti Banater Musichkapell“. Weil mir han derdorch die Gewißheit: „Wu gsung wird, dort loss dich ruhich nieder!“

Wanns vielleicht jemand intressiere tät: an der Kür han Schwowe aus bal alli Banater Derfer mitgemach, mir han sogar vun vieli Schwowe im Ausland Briefe un Kupons kriet. Un des war e großi Freed for uns, weil des beweist, daß mir Schwowe – so verschiede mir aach rede tun – doch zu dem Stickl Erd hale tun, des wu mer in der Welt Banat nenne tut, wu mir uf die Welt kumm, wu mir großgewachs, wu mir Mensche gin sin. Un wu mir die Musich an der Motterbruscht mitkriet han. Un wu mir unser letschti Ruh fine meechte …

Wie ich bemerk, wer ich langsam nostalgisch. Desweje zurück zu der Kür: Wie bei jedem End, misse mir aach do de Schlußstrich mache. Un unerm Strich steht: 182.798 Kupons for 61 Musichkapelle!! Awer der Schlußstrich bedeit desmolrum net ʼs End. Un grad desweje:

Owachtgen! ʼs großi Konzert mit die erschte 5 (finf) Gewinner wird in der zweiti Oktoberhälft abghal. Wanns meeglich is, were mir net nor een Konzert gen. Mir meechte aach in anri Banater Ortschafte großi Konzerte mit die finf Kür-Gewinner gen. Wann un wu die abghal were, wie un wu mer die Karte derfor kaafe kann, des were mir beizeite in der NBZ abdrucke. Eens is awer sicher: Beim erschte große Konzert in der Temeschwarer Olympiahalle were mir aach die Gewinner vun die vieli Prämien bekanntgen. For daß mir des Konzert grindlich vorbereite kenne, ersuche mir die finf Kapellmeistre, am Freitach, de 2. Oktower, um 10 Uhr, in die Redaktion zu kumme!!

Eich alli viel Xundheit de Simpl Mischko

aus NEUE BANATER ZEITUNG / PIPATSCH, Temeswar,

 19. September 1981