Zehnte Lagebericht

Die großi „Pipatsch“-Kür: Welches is die beliebteschti Musichkapell im ganze Banat?

Bis am Dunnerschtag sin 20.076 Kupons in der Redakzion ingetroff / Die Kür geht weiter bis im September!

Owachtgen! Die Pipatsch-Kür um die beliebteschti Banater Musichkapell geht weiter! Bis zum 15. September (Poststempel). De letschte Kupon erscheint am 13. September, e Sunntach. Bis dann sin noch siewe Wuche, mit siewe Samstäch un siewe Sunntäch. Ihr kennt aso weiternaus Kupons ausstelle un inschicke!

Des großi Blosmusichkonzert, des wu die drei Kapelle mit die meischti Stimme gen were, were mir Ende Oktober in de Olympiahalle vun Temeschwar organisiere. ’s genaui Datum were mir beizeite in der Zeitung bekanntgen. Un aach wu mer sich Karte derfor verschaffe kann. Bis die Schul anfangt, winsche mir eich alli viel Freid bei der Kür.

Die letschti Wuch sin mir wieder mehr wor: Noch drei Musichkapelle han Stimme kriet, so daß jetz bei der Kür 40 Formazione mitmache! Un des gfreit uns.

Annuliert han mir die Wuch noch zehn Kupons, die wu uns de Burghardt Ottmar (Deitschstamora) zammt mit anri ingschickt hat. ’s wore Kupons for die „Kür der Theaterlieblinge“ (schun wieder!), un die kenne mir net anhole. Per total han mir in zehn Wuche nor 35 Kupons annulliert, was jo gar net viel is ...

Beruhiche meechte mir zuerscht alli, die wu uns frooe, ob ihre Kupons ankumm sin: Birnstiel Franz (Rekasch), Eck Hermine (Temeschwar), Müller Anneliese (Birda), Denghel Sigrid (Neipetsch), Kiss Anton (Nitzkydorf), Melmer Edith (Tschakowa) un Seffernik Franz (Kemten – BRD). Jo, sie sin ankumm un in dere „Schuchschachtel“ drin, die wu inzwische mit eener Kischt, in der wu e Telewisor drin war, ersetzt is gen!!!

Wer die meischti Kupons ingschickt hat, meecht de Ungar Alfred (Lugosch) un aach anri Musichfreind geere wisse. Des tät uns aach interessiere, awer mir han ke Zeit derfor. Wann awer jemand sich die Mieh mache will, die iwer 20.000 Kupons noh Ortschafte oder Nome zu sortiere, der kann in die Redaktion kumme. Uf alli Fäll soll er sich Hilf (un aach de Brotsack!) mitbringe.

Nohgezählt han mir ’m Hehn Herwig (Bruckenau) sei Kupons, aach wann er gschrieb hat, des wär net notwendich, weils genau hunert sein. ’s ware wirklich genau 100!

A Kupon mit Krempitta han mir vum Watzulek Annemarie (Wetschehaus) kriet. Weil mer dort ke Papier im Gschäft find, hat sei Motter zufällich grad die Zeitung ghol, in der wu de Kupon drin war. E Unglick is des grad net, mir han de Kupon angrechnt un meine, de Krempitta hat Eich gut gschmeckt!

Uf Hilf derft Ihr weiter hoffe, liewi Bedö Gabrielle un Gerlinde (Temeschwar). Des han mir aus eem Brief vum Vetter Franz erfahr. Wann Ihr ausm Urlaub zuruckkommt (Hoffentlich halt ’s Wettermit eich!), kennt Ihr weitermache un aach nohhole.

E guti Methodi for Kupons sammle han die Mickl Regina un Sieglinde (Wetschehaus) rausgfun: Sie hole am Montach die Scher in die Hand un gehn vun Haus zu Haus. Un die Leit sin sogar froh, dass jemand ehne die Schreibarweit spare tut!

Wer daß gewinne werd, is noch ungewiss, ment de Vetter Thees Sepp (Bokschan). Awer e bissl kann mer die Lage jo doch schun „dorchblicke“! Net? Ob mir ’s Klassament weiter abdrucke oder geheim hale were, hängt natierlich net vun uns ab. Mir mache, was die meischti Leit sich winsche. Des is Demokrazie!

Eier Privatangelejeheit, liewer Raber Franz (Temeschwar), han mir erledicht. Natierlich net so, wie Ihr des gement hat. Leider. Ihr werd bal e Schreiwes krien.

Gschrieb han uns außerdem noch: Friedmann Alfred (Hatzfeld), Weldi Hans un Hilde (Kowatschi), Kuschill Maria un Jost Ludwig (Pesak), Nix Johann un Liegl Manfred (Johrmark), Zens Siegfried (Wojteg), Stromer Dagmar (Neipetsch), Streitmatter Josef-Otto (Wetschehaus) un Glaszer Sepp (Temeschwar).

Zum Schluss noch ’s Klassament. Draus gsieht mer, wie die 20.000 Kupons verteelt sin:

1.	Matthias Loris, Jahrmarkt	3.729
2.	Anni Hann, Temeschwar	3.715
3.	Rudi Hellner, Blumental	2.621
4.	Peter Zimmermann, Nitzkydorf	1.792
5.	Hans Kaszner, Jahrmarkt	1.520
6.	Jakob Rieder, Billed	1.060
7.	Peter Pohl, Neipetsch	1.025
8.	Hans Griffaton, Großjetscha	955
9.	Hans Maly, Temeschwar	895
10.	Josef Bleiwerk, Wetschehaus	580
11.	Herbert Lindner, Bakowa	524
12.	Werner Maurer, Freidorf	330
13.	Nikolaus Hubov, Lugosch	240
14.	Hans Klug, Detta	193
15.	Karl Palmy, Uiwar	132
16.	Reinhard Scherer, Bruckenau	130
17.	Martin Frombach, Lugosch	63
18.	Karl Zwick, Bakowa	60
19./20.	Franz Müller, Darowa / Stefan Engel, Triebswetter	52
21.	Franz Huszar, Semlan	45
22.	Josef Blum, Großjetscha	42
23.	Nikolaus Hinkel, Tschanad	38
24.	Hans Tillschneider, Grawatz	33
25.	Josef Stritt, Saderlach	31
26.	Hans Mayer, Semiklosch	30
27.	„Kokeltaler“, Arad	26
28.	Josef Lutz, Rekasch	26
29.	Alois Berwanger, Rekasch	24
30.	Hans Schmitz, Sacklas	22
31.	Philipp Barth, Liebling	11
32.	Hans Graf, Hatzfeld	10
33.	Martin Lutz, Rekasch	8
34.	„Pipatsch“-Kapelle	7
35./36.	Nikolaus Meinhardt, Lenauheim / Karl Heinz, Lowrin	3
37.	Dieter Marx, ...	2
38./40.	Andreas Weber, Sanktanna / Seppi Hollocker, Engelsbrunn / Ludwig Mühlroth, Ollershaus	1
	annuliert	35
	Total Kupons	20.067

’s winscht eich Xundheit un weiter viel Gspass bei der Sach

de Simpl Mischko

aus NEUE BANATER ZEITUNG / PIPATSCH, Temeswar,
 25. Juli 1981