Die Ingolstädter Kerweih schwowisch kommenteert
Die Ingolstädter Banader Schwowe hun desjohr e Kerweih mit
vill Iwerraschunge – gude un schlechte – gfeiert. Wann ich des Ganze
chronologisch, asso so scheen in de Reih verzähle will, muß ich glei mit ooner
beeser Nachricht onfange. Zwaa Täch vor der Kerweih (21. September 1996) hot de
eerscht Geldherr abgsaat. Er muß zum Bund, hot er gsaat, grad e Tach vor der
Kerweih. Jetz werd’s awwer wirklich Zeit, daß de Rühe uns e Berufsarmee ufbaut, sunst holle se uns noch alle Kerweihbuwe
weg.
Awwer des war alles noch zum vertroon, weil e Ersatzgeldherr
war schnell in der Person vu’me junge Verwandte vun der Geldherrin funn. Zum
Hoorrausreiße is es eerscht kumm, wie e Tach speder aah der abgsaat hot. Der
war nämlich schun verheirat un sei Fraa hot im letzte Moment dezwische gfunkt,
weil se ängste hat ghat, do kännt sich mit oom vun dee hibsche lediche Kerweihmäd
etwas onbandle. Asso ich muß schun zugewwe, ich hun die Kerweihmäd gsiehn un
kann die Fraa verstehn. Mei bessri Hälft hot noh der Kerweih aah gemoont, mei
Koppweh wär bestimmt vun dem ongstrengte Schaue kumm.
Des klingt zwar alles e bißje komisch, war awwer forr’s Schüpfer Hedi, die Tanzgruppenleiterin
un Chefmanagerin vun der Kerweih, e toternsti un ungemietlichi Situation. Zum
Glick gebt’s jo doch noch so stramme Kerle wie de Geiss Arnold (Temeswar). Der is finef vor zwellef ingsprung un
hot’s Schüpfer Hedi vor’me Herzinfarkt
gerett.
Mer misse aah net norr bei de schlechte Iwerraschunge
bleiwe. Zum Glick kann merr aah Scheenes vun der Kerweih berichte. Die
Moritz-Kerch war voll, un unser Schwowepharre Zillich mit seim Akkordeon hot scheen gepredicht un gsung; nateerlich
e Lied iwer die Banader Heimat.
Vor’m Rathaus war de Vorsitzende vun de Ingolstädter
Schwowe, de Metzger Hans, noo angenehm
iwerrascht, wie glei zwaa Bürgermaastre, de Stadtkämmerer Hans Amler un de Sport- Kultur- und Sozialbürgermaaster Werner Pößl, sich mit Äppl un
Rosmareinstreißcher inlade geloss hun. Aah de CSU-Chef vum Kreisverband, de Manfred Hochstatter, un die
Stadträtinne Brigitte Fuchs un Simone Rottenkolber ware do. Im Festzug
dorch die Altstadt sin de Moritz-Pharre Leo
Pröll un de Vorsitzende vun unser schwowische Nochberschleit aus’m Landkreis
Neuburg-Schrobenhausen, de Franz Allar,
mitmascheert. De Trachtenverein Enzian
hot in seiner Miesbacher Gebirgstracht de Kerweihzug net norr länger, sondern
in eerschter Reih aah noch vill schänner gemach. Die Marschmusik hot e
Blechmusik geblos, die wu de Hartmann
Toni (Neiarad) forr die Kerweih zammgtellt hatt.
Im Stadttheater hot noo uf die Organisatore wedder e
unangenehmi Iwerraschung gewart. In’s Saal sin grad mol halwer so vill
Kerweigäst kumm, wivl merr gebreicht hätt, um die Auslagen zu decke. Die Leit,
wu do ware, hun e scheene Kerweihaufmarsch vun sechs schwowische Kinnerpaare,
zehn große Kerweihpaare un zehn Enzian-Trachtepaare gsiehn.
Es Schmidt Verena
(Deitschbentschek) un de Schicht Klaus
(Deitschbentschek), e Kerweihimport aus Nürnberg – die zwaa ware’s
Vortänzerpaar bei de Kinn -, hun herzhaftich e Spruch gsaat un ehre Strauß de
Kinn vum Patenverein Enzian
iwergewwe. Die werre‚ne bis uf’s Johr hege un pflege. |
| FotoQuelle: BANATER POST |
Noo hun de eerscht un de zwatt
Geldherr ehre Kerweihsprich vumm Faß runner gsaat. Es eerscht Geldherrepaar
ware de Geiss Arnold – des hun ich
eich jo schun gsaat – un’s Wille Andrea
(Sanktanna). De Martin Arnold
(Dolatz) un’s Schüpfer Renate
(Hatzfeld) ware’s zwatte Geldherrepaar.
E neii Iwerraschung war de Mlynarzek Franz als eerschter
Kerweihvatter uf ’re Ingolstädter Kerweih. De Franz (Sanktandres) hot sei Sach sehr gut gemach. Norr oomol is’m
die Flasch beim Schwenke fortgfloo. De Strauß hot er suverän versteigert un aah
Hut, Tuch un Flasch ehrlich verlost. Asso ich hun net gheert, dass do vorher
schun etwas ausgemach war. Awwer ich hun aah net denoh gfroot.
De Strauß hot de Schüpfer Robert (Hatzfeld) gewunn. Forr
de Hut hatt de Dietrich Stefan
(Grawatz) es richtiche Los un forr’s Tuch die Wille Wess Anni (Sanktanna) ghat. Die Kerweihflasch hot die Schmidts Wess Liss (Semlak) mit
hoomgholl.
Als nächstes hun die Ehregäst an’s
Mikrofon därfe: de Bürgermaaster Hans
Amler, de Krier Pheder, als Chef
vun de bayrische Banader Schwowe, un de Schneider
Helmut, de Vorsitzende vun unsrem Hilfswerk, des wu so vill forr unser alte
Leit macht un noch mache will. Alle drei hun sich korz un bindich gfaßt, so
daß die Musikante jetz was forr ehre Geld mache hun känne.
De Sepp Werner und seine lustigen Musikanten
ware e sehr angenehmi Iwerraschung. Daß es Leit gebt, die wu grad dann Walzer
un Polka tanze wolle, wann die Kapell die Erkennungsmelodie vum Musical Cats spillt un singt – die Kapell hot
nämlich e prima Sängerin mit ooner gschulter Stimm -, un daß annre grad dann e
Rock ’n Roll uf’s Parket leje wolle, wann die Kapell etwas forr’s schwowische
Gmiet spillt, odder daß Leit vun der Tanzlust just dann unwiederstehlich
gepackt werre, wann die Musikante Pause mache, an des hot de Metzger Hans, als Blitzableiter forr
schwowischi Ungeduld, sich schun lang geweehnt. |
| FotoQuelle: BANATER POST |
Vum Potche Toni kommenteert in seiner Johrmarker Mottersproch
aus BANATER POST, München, 10. Dezember 1996
Keine Kommentare:
Kommentar veröffentlichen