Musikantestreit

Pause in der Blechmusikprob. Die Musikante stehn in kloone Gruppe zamm un verzähle.

Toni vun Neiarad: Host schun die letzt MEINE MELODIE geles?

Toni vun Johrmark: Wannst die Ausgabe vum Fewer moonst, jo.

Toni vun Neiarad: Was saast zu dem Artikel iwer de Toni vun Glogowatz?

Toni vun Johrmark: Dee Artikel hun ich geles. Des is awwer net der Toni vun Glogowatz. Des muß, e Irrtum sein.

Toni vum Neiarad: Wieso e Irrtum? Ich kenn doch de Toni, Mensch. Ich hun de Hoom sogar Musik mt’m gemach.

Toni vun Johrmark: Ich kenn ’ne aah. Der hot im 92er mit seine Rosenkavaliere do in Ingolstadt e großi Schou abgezoo.

Toni vun Neiarad: Na also, des is er doch.

Toni vun Johrmark: Des is er eben net.

Toni vun Neiarad: Saa mol, willst du mich verarsche? Es is doch sogar e Bild vun’m drin.

Toni vun Johrmark: Reiner Zufall.

Toni vun Neiarad: Was forr e Zufall? Un sogar vun seiner Fraa, vum Rosi, un vun de Rosenkavaliere steht was in dem Artikel.

Toni vun Johrmark: Reiner Zufall.

Toni vun Neiarad: Geh fort, du host dee Artikel gar net geles.

Toni vun Johrmark: Freilich hun ich ne geles. Awwer dort is die Redd vu’me annre Toni. Daß der unsrem Glogowatzer Toni wie aus’m Gsicht gschniet is, un daß dem sei Fraa aah Rosi haaßt, un daß der e Kapell hot, die wu aah Rosenkavaliere haaßt, des saat noch gar nicks. Mer Deitsche sin e 80-Millione-Volk un do kann so e großi Ähnlichkeit schun mol vorkumme. De oonzich Unnerschied zwischen unsrem Glogowatzer Toni un dem Toni aus MEINE MELODIE is halt die Abstammung. In dem Artikel steht doch schwarz uf weiß, daß de Toni, der wu mi’m Walter Scholz im Südwestfunk-Symphonieorchester spillt, e „gebürtiger Baden-Badener“ is.

Toni vun Neiarad: Mensch, des gebt’s doch net. Ich kenn de Toni heechst perseenlich. Des is unser Banader Starklannetist. Wann die aa e Schmarre in dem Artikel zammgschrieb hun.

Toni vun Johrmark: Ich soon, des is e annre. De Zufall hot halt wedder mol vruckt gspillt. Odder soll de Toni vleicht sei Identität … Waaßt schun, was ich moon.

Toni vun Neiarad: Jetz spinnst awwer onstännich. So etwas meecht de Toni niemols mache.

Toni vun Johrmark: Dann sin die zwaa vleicht Zwillinge; norr daß der oon in Glogowatz gebor is un der anner in Baden-Baden. Des is bestimmt so. Es kann aah norr so sein.

Berns Toni

aus BANATER POST, München, 10. Juli 1996