Musich ausm Kroteloch

Musich is scheen. Do kann mr nix drgeje saan. Wann die Loris-Kapell oder die Kaszner-Kapell vun Johrmark spiele, die Musikante vun de Anni Hann, die Schmitz-Kapell vun Sacklas oder die vieli anri Musichformazione aus de Stadt un vum Land. Wann mr de Schubert-Chor singe heert, werds eem warm ums Herz un mr ruft bravo, scheen wors, nor so weitermache! Net scheen awer is es, wann mr in Fratelia am Owed am Ecke vun de Shakespeare- un Muzicescu-Gass steht un dem Konzert vun de Krote zuheert, die was dort in deni Wasserlecher lewe un sich luschtich vrmehre.

"Hat Dir do e eigni Krotezucht", han ich e Ingeborene vun dort gfroot, "oder gheere die do de Stadt?"

"Die Lecher do un de Grawe han die städtischi Bulldozer ausghob, un's Wasser spendiert de Himmel. Die Krote fiehle sich do wie Gott in Frankreich, sin luschtich un fidel un han e Orchester gebild, was sich heere losse kann. Horcht norr hin, wie scheen die des mache", hat der Mann mir des gsaat.

Ich han hinghorcht un ich muss saan, die kenne sich wirklich heere losse. Do wor eich e Solist mit ner ganz gwaltich Stimm, e Krotebaritonist. Begleit is er gin vum Krotechor. Des wor eich e Konzert, des was mr ufhole hätt misse for die Plattespieler un die Kassetofoner.

"Mit dem is awer noch nit genuch", hat e anre gement, "wann dann noch die Katze ufm Bodm anfange ihre Lieweslieder zu singe, is for nächtlichi Zerstreiung gsorcht. Nor dass mr die Katze mit paar gut gezielt geworfeni Krumbiere steere kann. Geger die Krote awer is mr machtlos."

"Un sin die nor do, bei Eich drhem, die Krote?"

"Aso, am  Ecke vun dr Ulpia-Traiana- un dr Migdalelor-Gass hat sich do neilich e Konkurrenz ufmache wille. Es wore awer nor jungi Choriste, ohni Solist. Wies Reenwetter dann ufgheert hat, hat sich de Chor ufgeleest. So sin mir mit unserer Sängerschar alleenich geblieb. Ich men, mir sin do alleenich in dr ganzi Stadt. Mr soll eigentlich stolz sin uf so e Attrakzion, wann der Mensch net des Bedirfnis nohm Schlof han tät. Un inschlofe, bei dem Konzert? Wer hat schun so was gheert? Mir leije im Bett un gfreije uns, dass dr Summer erscht anfangt un dass mir des Glick han were, bis spot im Herbscht jede Owed un jede Morjet umsunscht des Krotekonzert heere zu kenne. Es git Leit bei uns, die mene, wie des wär, wann mr die Krote uf e Turnee schicke kennt, zu anre. Ganz umsunscht un gratis. Mr brauch drfor nor e Bulldozer anstelle, der hebt paar Lecher aus, des Wasser is dann ke Problem meh, un die Krote, die spendiere mir."

Die Krote gheert un die Meenunge ufgschrieb hat de Vetter Niklos.

aus NBZ / Pipatsch, Temeswar, 10. Juni 1979