vum
Vetter Matz vun Hoppsenitz
 |
| Hans Kehrer alias Vetter Matz vun Hoppsenitz |
Un holt mer sichs noch
so gut vor: Mit Ufregung un Nerve is die Reise angang! Der Bus for die
Johrmarker Loris-Kapell wor
pinktlich, der for de Schubertchor is mit nor 90 Minute
Verspätung angerickt. Am Stadtrand wor er schun perfekt defekt - bis e
anre kumm is, sin nochmol 90 Minute vergang un die Nerve han schun
getobt.
Awer rechtzeitich sin
mir alli in Großau ankumm - un uf des kummts an! Die
Loris-Kapell hat geblos, de
Schubertchor hat sei schenschti Lieder gsung, die "Leichti
Formazion" mit ihre Soliste hat de Abschluss gemach -, des wor alles in
Ordnung un hat de Leit arich gfall. Nohher tanze, stärke un de Dorscht
lesche. Die Großauer han sich wille entschuldiche, dass bei ihne des
Klima so rauh is un dass deswje dort nor "Dreimännerwein" waxt. E etwas
saure, resche. (Zwaa Männer misse eem hale, eener tut schitte, annerscht
kann mer de net trinke, oder besser: trinkt ne keener.) Awer der
Großauer wor net so, den kann mer noch lowe - der is for Männer! Na, un
Sänger un Musikante, die han noch immer e gute Zug ghat!
Was mache gscheite
Schwowe, wann se im Saxeland sin? Sie schaue sich um. Do stoßt mer jo uf
Schritt un Tritt mit der Nas uf die Geschichte! Un so is de
Schubertchor uf die "Michelsburg" gfahr, dorthin, wu aa die
Kersche so scheen blieje. Uf die Burg sin se nuf, han gsung - sogar for
alti Leit im Dorf, weil die se scheen gebitt han. (Un weil die alti Leit
immer derhem hucke misse un seltn etwas gsiehn un heere.)
Die Johrmarker
Musikante han die "Stadt am Zibin" grindlich gstudiert... Gewohnt han die Sänger
un Musikante in zwaa Internate, un de Professer Hans Speck wor des
Totumfaktum for alles - als Kulturheimdirektor un Hauptorganisator. Kaum wor er
in der erschti, korze Nacht ingschlof, kummt schun eene vun dene junge,
weltunerfahrene Musikante un weckt ne uf: "Herr Professer, des Licht ufm
Korridor steert mich."
"Na, machs doch aus!" - "Wu dann?" - Na, wu!?
Such de Schalter!"
Der jungi Mann is
weg, de Professer Speck is sofort ingschlof. Noh zehn Minute kummt der
jungi Mann nochmol, weckt ne uf un saat: "Ich hun de Schalter gfun uns Licht
ausgemach!" De Hans Speck war zu mied, for e Dunnerwetter loslosse!
Wie die Johrmarker
un de Chor in Neppendorf ingfahr sin, hat dene ihre Musich schun gewart un de
Marsch ingschlaa! Begrießung, Anred, Patschhand - un dann des Programm!
Leit, was e Saal,
so 800 oder mehr Persone drin, mer hat nimmi trete kenne! Am zwete Tach is de
Chor uf Schässburg gfahr un uf Wurmloch (wu mer awer die Einwohner net
"Wurmlöcher" nenne derf!), wu e scheeni alti Kercheburg is, un die Johrmarker
sin uf "Michelsburg". Dort is es no passiert! Wie die Musikante aus ihrem Bus
steije, kummt so e dreijähricher Sax uf de eene Posaunist, de Vetter
Franz, zu, zoppt ne am Iwerziejer un ruft: "Tata!
Tata!" Unser Vetter Franz hat mol Aue
gemach, de Kerl angschaut wie die Kuh s' neii Tor un sich gfroot, wieso er do so
bekannt is! Die anre Musikante han natierlich gelacht, die Motter vun dem Kleene
is gelaaf kumm un hat uf Saxisch gsaat: "Des is net dei Vater." Awer de Vetter
Franz muss dem Kleene sehr gut gfall han,
der hat gar net wegwille. Oder wor des "Die geheime Stimme des Blutes?"
Natierlich hats
glei solchi gin, was behaupt han, de Vetter Franz
hätt do vor vier Johr sei Urlaub verbrung, oder wor er wenichscht in "Delegazie"
do! Er hats gelaichlt un laichlt noch immer. (Ich saa: Sei Weib werd schun
rauskrien, was do Wohrheit un was Zufall is!) Ja, do muss mer saan: Wie weit
muss doch die Verbriederung zwischen Saxe un Schwowe fortgschritt sin, wann so
etwas schun vorkummt!
Mer kann jo net
alles ufzähle, was uf so eener Reise alles passiert. Awer scheen wors, wie die
Johrmarker mit de Neppendorfer Musikante dorch die Gemeinde marschiert sin un
mitnaner, wie een Kapell, de Mai angeblos hun! Des is dort so Sitte: Schun um
vier Uhr morjets gehn die Musikante dorch die Gasse un spiele. Wer se dann in de
Hof ruft un sich paar Extra-Sticker winscht, muss noch extra in de Sack greife.
So gets manichsmol Owed, bis des ganzi Dorf dorchgekehrt is. Die Johrmarker han
erscht zu Mittach angfang un wore bal drei Stun beim Maianspiele drbei. Un weil
grad e großi Hochzeit wor, han die Landler die ganzi Musich uf eemol ingelad. In
die Hef han se misse - do wor schun bal ke Loskumme mehr!
Schellenberg war am
dritte un Großscheuern am letschte Tach an der Reih. Dort han mir die
Mundartdichterin Maria Gierlich extra begrießt, un de Schubertchor
hat for sie e scheenes Volkslied gsung. Un wie des Baureweib no
hochdeitsch gedankt hat - ja, do hat mer horche kenne!
De Pipatsch-Schef,
was die ganzi Reise angstift hat, hat iwerall vor- un nohgschaut, ob alles gut
geht un jeder ufm Fleck is.
Ich selwer, als
Ansager, han jo e schweres Lewe ghat, dreimol aus- un wiedrum anzieje in eem
Programm, des is schun mehr wie e akrobatisch Iewung!
[...]
aus NEUE
BANATER ZEITUNG/PIPATSCH, Temeswar, 6. Mai 1979
Keine Kommentare:
Kommentar veröffentlichen