100 korze Gschichte zum Nohdenke

 Helli vun Bogarosch verzählt schwowisch vun der Banater Heed

Helli vun Bogarosch: E Schmunzle vun der Heed – Gschichte in schwowischer Mundart. Mirton Verlag Temeswar, 1996, ISBN 973-578-076-3. 140 Seiten.

Wann merr e Buch rezenseert, sellt merr vleicht es eerscht schreiwe, was am an dem literarische Werk net so gut gfall hot. Merr sellt bei der Iwerleeung ka Angst hun, daß merr dabei des Buch – ich moon sei Inhalt – in Sticker reist, so wie de Marcel Reich-Ranicki des mol mi‘m Günter Grass seim Roman Ein weites Feld versucht hot. Des is in der Praxis iwerhaupt aah gar net meeglich – norr uf‘me Titelfoto vum SPIEGEL geht so etwas-, weil e jeder Leser, ganz gleich ob er Professor odder Kiehhalter is, sich e ureigni Meinung vun oom Buch mache kann, was sovill haaßt wie, e Rezension is immer norr die Meinung vun oom Einzelne un kann nie als allgemein giltiches Werturteil ongsiehn werre.   

Drum schreib ich jetz aah unscheneert, was mer an dem Buch E Schmunzle vun der Heed vum Helli vun Bogarosch net so gut gfall hot. Es is oonfach de Titel. Der erinnert mich an so beriehmte schwowische Bicher wie Lache is steierfrei vum Ludwig Schwarz odder Lachendes Banat vum Robert Glatt. Des sin nun wirklich Bicher zum Unnerhalle. Beim Lese vum Helli vun Bogarosch seim Buch is awwer doch hinner jedem Schmunzle – zum Hart-Lache kummts am eigentlich nie – de Ernst vum Lewe im Banat zu speere. Daß es der Autorin vun dem Buch oft in bewunnernswerter Maneer gelung ist, so manchi traurichi, vun täglichem Kampf ums Iwerlewe geprägti Situation mit feinem Humor zu schildre, beweist zwar, daß die Fraa vill Optimismus, asso Leweswille hot, kann annrerseits awwer wahrscheinlich net verhinnre (is des iwerhaupt beabsichticht?), daß so mancher vun uns veredlte Westmensche sich beim Lese saat: So meechts uns aah gehn, wann mer jetz noch dort im Banat wäre.
Grad 100 Gschichte, korze Gschichte, awwer Gschichte zum Nohdenke, sin in dem Buch mit dem scheene schwowische Mädche uf‘m Deckl versammelt, un sie verzähle schlicht un oonfach, manchesmol sogar in sachlicher Kommentarform (die Verfasserin is Journalistin bei der BANATER ZEITUNG) vun unsrem gestriche Lewe im Banat un vun de Gebliebne ehrem heidiche Lewe. Es gebt ka Bereich vun der Kindheit, iwer die Jugendzeit un‘s Ehelewe bis ins Alter, wu net behandelt werd; un sogar so heikle, in unser deitsche Därfer bis zur total Ausreise gere forr vill Verunglimpfunge sorchende Themen wie es jugendlich unschulliche, ehrliche un in de Aue vun manche Alte so verwerfliche Verbandle vun Schwowekinn mit Rumänre kummt zur Sproch.
Wer des Buch mit Hilfe vum ISB-Nummre vleicht in der Buchhandlung net find, der kann ruhich aah an die BANATER ZEITUNG (ADZ - Korrespondentenbüro - Tel. & Fax: +40(0)256498210; E-Mail: temeswar@adz.ro) schreiwe. Dort arwet‘s Helli vun Bogarosch (bürgerlicher Nome: Helen Alba) nämlich in der Pipatsch-Gärtnerei als Brigadierin.

Berns Toni

aus DER DONAUSCHWABE, Aalen, 26. Juli 1998