Der Neibach-Oma ehre Rosmarein

E schwowisches Märchen verzählt im Johrmarker Dialekt

Korz bevor die Neibach-Oma aus Blummetal forr immer un ewich ausgewannert is, hot se vun ehrem scheene Rosmareinstock im Hof e Nästche abgschniet un in ehre Handtasch gstoppt. In Deitschland onkumm, hot se's in e Blummevas mit Wasser gstellt un alle Leit, die wu vun dem Rosmareinnästche gewisst un aah am Onfang bissje driwwer gspättlt hun, ware verwunnert, dass es noh'me Johr noch so frisch war un sogar getrieb hot. Wie noch e zwattes Johr vergang war, hot se's in ehre eerschte deitschlänner Gärtche gsetzt un, weil se schun immer mit Blumme gut umgehn hot känne, is de Rosmarein scheen groß un saftich grien wor. Noh paar Johr is kaum noch jemmand in de Hof kumm, der wu dee ippiche Rosmareinstock net bewunnert hot.

A'me scheene Tach hot e Rundschrweiwe vun der Landsmannschaft im Postkästche gelee. Wer e onstänniche Rosmarein forr de Kerweihstrauß spendeere will, soll sich beim Vorstand melle, war dort drin gschrieb. Des war der Neibach-Oma ehre Stunn. Uf die hot se im Geheime schun lang gewart. Wie se ehre Entschluss, de Rosmarein forr die Kerweih zu oppre, ehre Leit mitgetaalt hot, ware all froh un aah e bissje stolz. Ehre Sohn, de Ewald, hatt sich dee Platz vum Rosmareinstock schun lang forr e Trauwestock ausgschaut ghat, un's Erna, ehre Seenerin, hot sich glei e farwiche Bännerputz forr de Strauß vorstelle känne. Norr em kloon Hansi war des Zirkus ziemlich egal. Der hot sich meh um sei Fotballa gekimmert.

Wie noo die Kerweihbuwe kumm sin, un de Rosmarein gholl hun, ware de Ewald un's Erna schun e bissje iwerrascht, wie die Neibach-Oma sich noch schnell e Nästche abgschniet un ins Gärtche gsetzt hot. Die zwaa junge Leit, die wu sich sehr schnell in Deitschland ongepasst hadde, un mit der schwowisch Kerweih nemmi allzuvill zu ton hun wolle - "weil die doch nicht mehr zeitgemäß ist" -, hun norr die Käpp gschidlt.

"Bis der wedder groß is, gebt's bestimmt ka Kerweih meh", hot de Ewald bissich gemoont, wie er sei Platz forr de Rewestock wedder bsetzt gsiehn hot.

Die Neibach-Oma is mit ehrem Rosmareinsetzling awwer umgang wie mi'me Neigeborne. Sie hot ne alle Tach gegoss un schun noh ooner Wuch hot merr gsiehn, dass der ongewachs war.

Die Kerweih is rumgang, un die Neibach-Oma hot net die Zeit erwarte känne, bis die BANATER POST ins Haus kummt, in der doch bestimmt etwas vun ehrem Rosmarein drin stehn werd. Wie se noo do war, hot se glei de Artikel iwer die Kerweih geles. Je länger se geles hot, umso länger is awwer aah ehre Gsicht wor. Wann jemmand im Zimmer gewen wär, der hätt bestimmt bemerkt, dass die alt Fraa sogar feichte Aue kriet hot.

De Ewald un's Erna hun paar Täch späder bemerkt, dass ehre Motter, die Neibach-Oma, sich nemmi um de kloone Rosmarein im Gärtche kimmert. Aah de Hansi hot gspeert, dass es mit der Oma abwärts geht. Sie hot nemmi so vill gelacht un kaum noch mit ehm gspillt. Nemmol de Hausarzt hot e Rot gewisst. Er hot em Erna norr gsaat, dass es sich noh seiner Meinung um etwas Seelisches handle kännt. Umesunst hun de Ewald un's Erna awwer Tach un Naacht nohgedenkt; ehre Motter is kaum noch ufgstann, un's Rosmareinstäcklche hot ongfang zu welliche. Unner de Landsleit hot sich's schun rumgeredd, dass die Neibach-Oma 's ball ausmache werd, do hot an oom Sunntachmorjet es Erna de Zeidungshaufe, der wu sich uf'm Naachtskästche vun seiner krank Schweermotter ongsammelt hatt ghat, weggeroomt, un zufällich sin sei Aue uf die BANATER POST vun vor'me Monat gfall. Die war grad am Kerweihartikel ufgschlaa. Es hot schnell e Blick drufgeworf un die Zeidung schun zu de annre leeje wolle, do hot's doch nommol grindlicher vun vorre ongfang zu lese, un nommol, un nommol, un nommol. Noo hot's die annre Zeidunge in die Papiertonne getraa; norr die BANATER POST hot's mit ins Wohnzimmer gholl.

Noh'm Mittachesse hot's de Artikel iwer die Kerweih em Ewald zu lese gewwe. Der hot sich glei net denke känne, was sei Fraa mit dem beabsichticht, awwer noo hot er doch aah zwaamol geles un druf gsaat:

"Do steht awwer drin, dass de Kerweistrauß vun jemmand annerscht gspendeert war. Die misse sich verschrieb hun odder des Vortänzerpaar hot sich im letzte Moment vor der Kerweih e annre Strauß verschafft, vleicht e gräßre. An der Kerweih is mer nicks ufgfall. Die ufgeputzte Rosmareinstreiß sin halt all scheen."

De Hansi hot schun immer die Ohre spitze känne, un meistens hot er sich aah e Reim uf des mache känne, was die Große verzählt hun. Er is schnurstracks zu der Neibach-Oma ans Krankebett gang un hot mit ganz normaler Stimm gsaat:

"Oma, dei Rosmarein geht in, wanns'd ehm ka Wasser meh gebst. Ich will doch aah mol Vortänzer werre; noo brauch ich doch e scheene Strauß."

Noch am selwe Nammittach hot die Neibach-Oma sich ufgerafft, un die ganz Welt hot vu'me Wunner verzählt. De Rosmarein wackst un wackst, un er wackst der Neibach-Oma gar net schnell genuch, weil de Hansi, der is e ganz Schärfer, der hot jetz schun e Mensch. Do werd's net lang daure, bis er mit der Kerweih geht.

 Potche Toni

aus BANATER POST, München, 10. April 1995