Wie ich vor 11 Johr uf
Deitschland kumm sin, hot mich - nateerlich aah alle anre Leit, die wu grad
Fernseh gschaut hun - es eerscht de Karl Moik begrießt. "Herzlich
willkommwn im Musikantenstadel, hier in der Stadthalle so und so", hot er gsaat.
Mei, war des scheen. Ich hun gemoont, ich sin im siwete Himml. Des
Kukruzkolwebiehnebild hot mich faszineert. Es hot ausgschaut wie in meim
Großvatter seim Kotarka vor der Kollektiwisare.
Ich soon eich Leit, ich war ganz
Moik-sichtich. Haschisch is do wahrscheinlich gar nicks dagee. Noch bevor ich e
Flichtlingsausweis ghatt hatt, hun ich mer schun vum eerschte
Arwetslosegeld e gebrauchte Videorecorder kaaft, forr daß ich all die ville
Musikante, die wu beim Moik spille, immer un ewich onschaue kann. Ich hun
in meim Volksmusikrausch - jo Leit, ich war wie bsoff - gar net bemerkt, daß die
Musikante beim Moik, bei der Carolin Reiber, beim M & M-Ehepaar,
beim ewich haasre Steiner un seiner Tochter, beim Hermann Efi
usw., usf. jo gar net blose, un daß die Sänger/inne iwerhaupt norr's Maul uf un
zu mache, awwer ehre Stimmbänner verschone.
Asso verarsche loss ich mich net.
Die Volksverdummung mach ich nemmi mit, hun ich mer noo gsaat. Ich war so
richtich gallisch un hun ka oonzichi Volksmusiksendung meh gschaut. Bis vor
vier, finef Johr, do hot's mich noh wedder gepackt. Wie sich unner de Landsleit
rumgeredd hot, daß der un der am Fernseh in der un der Kapell zu siehn war, hun
ich mer e extra Kassette kaaft un hun unser Schwowemusikante regelmäßich ufgholl.
Es is doch egal, hun ich vor meim Gewisse argumenteert, ob die wirklich singe un
spille odder ob die norr so mache. Wichtich is, de alte Leit gfallts un sie hun
ehre Fraad an unser schwowische Musikante, wann aah oft in annre Trachte. Wie
noo noch die Mara aus Sanktanna mit dem scheene Kinstlernome Kayser
in meiner Flimmerkist ufgetaucht is, war ich, un net norr ich, glei ganz aus'm
Heisje. Endlich e banater Blimche, wann aah norr e Plastikblimche uf der Hutwatt,
hun ich mer gedenkt. De Rasen, uf dem wu die Fernsehvolksmusikante so mache, als
ob se Musik mache meechte, is jo aah norr e synthetischer Teppich.
 |
| aus Frau mit Herz, 26.10.1995 |
Un in meim neie
Glickseelichkeitsgfiehl - die Mara singt net norr scheen, sie is halt aah
e scheenes Weibsmensch - hun ich fast e Johr lang gar net bemerkt, daß die sich
jo in der Öffentlichkeit als Saarländerin un net als Banader Schwowin ausgebt.
Wie ich des awwer mitkriet hun, sin ich halt wedder fuchsteiwlswild wor, was
meiner "besten Ehefrau von allen" - so etwas hot nämlich net norr de Ephraim
Kishon, sondern e jeder onstännicher Schwob aah - nateerlich e Heidenspaß
gemach hot. Ich moon, die is eifersichtich un sicher aah noch schadefroh. Wie do
unlängst noo awwer im Bayrische Fernseh so e Musikfilm - mei Sohnemann hot mich
belehrt, daß des Videoclip haaßt - gelaaf is, war ich gspannt wie e frißne
Reenschirm, weil in're dreiveertel Stunn werd die Mara bestimmt aah vun
ehrer schwowischer Kindheit redde, hun ich mer gedenkt. Denkste. "Weit gefehlt",
hot mei ongetrauti zwatti Seel frohlockt. Nicks, awwer rein gar nicks hot's
gsaat, es Mara. Unser Mara!? Norr vun seiner Oma hot's verzählt.
Awwer nemmol die hat die Ehr ghatt, als Banader Schwowin erwähnt zu werre.
Jetz sin ich stinksauer. Mei
Sohn, der Lauskerl, hot gsaat: "Komm Papa, ich zeig dir einen echten Künstler,
der auch weiß, wo er herkommt." Noo hot er mer e Buch iwer de Peter Maffay
gebrung. Wann ich net gsitzt hätt, wär ich beim Lese glatt uf de Arsch gfall. Es
eerschte Kapitel vun dem Buch is dem kloone Peter seiner Kindheit in
Kronstadt gewidmet. Glaabt mer Leit, ich sin heit noch bloo vor Neid. Forrwas
hot der Mann e Vergangenheit , wieso is der aah als Weltstar des geblieb, zu was
unser Herrgott ne gemach hot, e halwer Sachs un e halwer Ungar. Is des net
scheen, wann e erfolgreicher Sänger wie de Peter Maffay bekennt: "Ich bin ja zu
Hause sogar dreisprachig aufgewachsen, weil mein Vater Ungar ist." Un de Biograf
fangt sei "Peter-Maffay-Story" mi'm Onfang on: "Kronstadt in Rumänien. Vier
Jahre nach dem Zweiten Weltkrieg leben in der Stadt, die am Nordrand der
Karpaten liegt, noch ungefähr 100.000 Menschen. Die Rote Armee ist in das Land
eingezogen und mit ihr eine neue Ideologie. Doch die vom Krieg gebeutelten
Menschen in den zerstörten Städten wollen nichts von Ideologie wissen. Sie
denken nur ans Überleben, daran, daß die Kinder genug zu essen haben, daß Holz
in den Ofen kommt. In einem Vorort von Kronstadt wird in dieser trostlosen Zeit
am 30. August 1949 ein kleiner Junge geboren. Seine Eltern, der Vater ist Ungar
und die Mutter Siebenbürgendeutsche, nennen den Jungen Peter Alex."
Ich sin net norr bees, Leit, ich
sin aah traurich. Jo, ich kennt kreische. Vun unsrer Mara, unsrem
schwowische Sternche mit falscher Identität werd's nie e Biografie gewwe, weil
dem wu sich sei Kindheitsumgebung net ingeprägt hot, dem fehlt halt es
Wichtichste vun're Biografie, nämlich de Onfang. Un was gebt's schun ohne Onfang?
Nemol e Brotworscht, nicks, gar nicks.
Berns Toni
aus
DER DONAUSCHWABE, Aalen,
24. September 1995
Keine Kommentare:
Kommentar veröffentlichen