E scheene Gruß

Dem Alter die Ehr'

Vetter Ignaz Rosar aus Jahrmarkt erzählt

.

Wer hat Eich gsaat, dass Dr doher kumme selt? Jo, jo, des is wohr, jetz sin ich de ältst Musikant in Johrmark, un aa schun vun de ältste Leit im Dorf dohie; noch vier Männer sin vor mer. Siebnunachtzich Johr wer ich im Dezember, ich hun schun viel gearwet, un ich hun gere gearwet! Gere gearwet un gere bei dr Musik!

Wie ich oongfang hun bei dr Musik? Dohie war e gewisser Kasznel in dr Alt-Gass, der war unser Kapellmaaster, der hot uns gelernt, un bei dem war ich, bis ich aus dr Schul geblieb sin. Un nodem hot uns de Rastätter iwerhol, no war der unser Kapellmaaster un hot uns gfiehrt. Un no späder erst, viel späder sei mer zum Loris. Mi'm Rastätter sei mer spiele gang, awer semols sei mr noch net in anre Derfer gfahr, hu mer nor do in Johrmark gspielt im Wertshaus. Un do war selmols noch e Musikbanda, die Feierwehrmusik, jo, die war aa noch do, die hot e anre gfiehrt, die hot e gewissene Jauch gfiehrt.

Nikolaus Kreuter (1903 - 1970) gründete
in den 1930er Jahren eine Schrammelkapelle
und später auch eine Blaskapelle,
die bis 1958 auftrat.
v.l.: Nikolaus Kreuter (1903 - 1970),
Sebastian Seibert, Martin Kassnel,
 Peter Kelter, Josef Scheuer

De Loris hot uns iwerhol, des war schun 1908, un wie der uns iwerhol hot, no is des jo schun anerscht gang, no war aa Schluss mi'm Rastätter, vun no an war Loris, Loris Peder - war e gude Musikant! Un sei Bruder aa, net wohr? Un ich war jo'm Loris sei rechtsi Hand, wann er net do war. Ich war Primasch! Ich war Violinist un Klarinettist. Gspielt hun mer im Wertshaus, mol beim Seiwert, mol beim Pannert - heit do, morje dort, wie des schun gang is, aa beim Kolling drowe. Ja, un do wu jetz es Kulturheim is, do hun mer viel gspielt, wu se jetz aa noch Spiele de Loris un de Kaszner. Och, do hun mer viel gspielt! Un gudi Musik gemach! Alles hun mer gspielt, un do war jo no späder noch e Musik im Dorf, de Kräider!
Aso Musik hun ich aa beim Militär gemach. Ich hun bei de Aanunsechzicher gedient, Temesvarer Regiment! Do war ich une in Bosnien, un dort hun ich aa Musik gemach. Dort war unser Batallion, dorte une in Dalmatien. War aa im Schitzegrawe in Italien, un no hun uns die Italiener dort mol ghapscht, no war ich in Gfangenschaft in Italien, zwaa Johr. Ja, die Italiener hun uns selmols gschnappt. Im Neinzehner sin ich erst hoomkumm. Jo, awer aa dort in dr Gfangenschaft hun ich Musik gemach, jo, aa dort Musik gemach - for die Musik leb un sterw ich!

Wie lang ich lewe mecht? Bis ich sterwe, naja. Jetz wer ich 87, ich hun jo meins gemach. Wann se rufe, no geh mer. Es tut mer jo laad, awer wann's haaßt "Hai kumm mit!", no geh mer.

Jo, ich hun meins gemach, ich hun viel gearwet, ich war Maurer, im 63er sin ich in Pension gang, hun awer noch paar Johr lang weider gearwet. Jetz gehn ich im Hof hin un her, no gehn ich mol uf die Gass, schau mol naus, no gehn ich in de Garte, no ärjer ich mol e bissje mei Tochter ... Na no gehn ich schaue, ob die Zeidung noch net kummt, ob net's Tirche geht. Na no les ich die Zeidung, mir hun de "Neie Wech", no les ich alles, alles, alles, e jedes Sticklche, was drin is. Mit dem tu ich mer die Zeit vertreiwe, ich hun immer die Zeidung ghat, schun vun friehjer her immer - die "Extrapost". Ich hun jo viel geles im Lewe!

Mir ware unser drei Gschwister im Haus, jo, drei, noch e Zwillingsbruder un noch e Schwester. Ihr seid aa e Zwillingskind? E Schwester hätt'r? Na no kenne mer uns jo stolziere! Do in dem Haus sin ich gebor, in dem Haus. Des war jo anerscht, mir hun jo schun bal alles rumgeworf, des war jo friehjer so e gewehnliches Haus, etwas besser wie e Koliba. Vun Kotstoon un Dreck is es. Des is die Zigeinergass do, un do ware meistns so kloone Häiser, do ware nor Kloonhäisler gewohnt in dr Zigeinergass, lauder Professioniste. Was e Peerd hun ghat, ware vlleicht in ganzem vier, finef, was e Peerd hadde, e Oonspänner. Ich nix, niemols e Peerd ghat, nix, niemols ghat! Mei Peerd war Temesvar!

Wie ich in die Lehr gang sin, vun Oonfang on sei mer zu Fuß gang uf Temesvar zum Maaster. No, wie ich mich mol e bissje gspeert hun, no hun ich mer e Bizikl kaaft, un wie mer mol's Bizikl hadde, sei mer nemmi zu Fuß gang - no sei mer gfahr! Jede Tach zwelf Kilometer bis in die Stadt. Ich hun vier, finef Johr noch beim Maaster gearwet, un noher aa meistns in Temesvar, un aa in Ferdinandsberg, dort hun mer Martinseefn gebaut. Alle Tach uf dr Arwet. Un des war's Schwerste in meim Lewe: Alle Mondach morjets uf un in die Stadt, des war's Schwerste. No Dienstach is es jo schun besser gang, na un no samstachs is schun gschaut wor, dass beizeide nogeloss werd, un dje! Drhoom glei ins Wertshaus mit'r Gei un mi'm Inschtrument - Klanett, na ja freilich. Unser Kapellmaaster hot uns gedrillt - geh mer! Zwaamol war Prob, mittwuchs un samstachs. Na un no, wann no Tanz war, no war's scheen, hun mer gspielt, un meiner Fraa hot des aa gut gfall, sie is aa ins Wertshaus mit, un des war aa vum Schenste, iwerhaupt wie mer jung verheirat ware.

Selmols hun mer aa unser Haus dohie in Ordnung gebrung. Selmols war's Dorf un iwerhaupt die Zigeinergass jo noch weit zrick! Awer die Leit hun oongfang immer e bissje was mache, noch e bissje, geh mer, mach mer was, dje! Un so hun se halt e bissje verschenert die Häiser. Na un mir do aa, wann ich hoom sin kumm vun dr Arwet, na mach mer was, geh mer, mach mer e bissje was, un so is es halt immer weider un immer besser gang. Un so hun mir Professioniste uns aa ganz gut dorchgschlaa. Awer gearwet - viel!

 Loris-Kapelle in den 1930er Jahren. // stehend v.l.n.r.: Jakob Haas, Mathias Jost (Spitzname: Hannese Matz), Peter Tasch, Hans Potche, Josef Scheuer (Scheier Joschka), Sebastian Marx (Pichler Bascht), Josef Windrich, Peter Helebrand, Michael Kasnel, Anton Linz, Johann Loris (Fizigoi Hans) // sitzend v.l.n.r.: Anton Krämer (Berns Toni), Michael Kumaus, Georg Tasch, Johann Kaszner (Safer Hans - Vater des späteren Kapellmeisters der Kaszner-Kapelle), Peter Loris, Franz Jost (Windrich Franz), Mathias Loris, Peter Schmidt, ... Starr, Heinrich Till // 
vorne v.l.n.r.: Heinrich Schöntal, Mathias Loris (der spätere Kapellmeister der Loris-Kapelle), 
Michael Ebner (Kasper Michl)

Na ja, freilich, un Musik gemach. Heit owed is jo des Jubiläum, un ich sin de ältst Musikant, de letzte, was noch vun dr Grindung is, vum Loris Peder. Ich tät jo vun Herze gere gehn, awer ich kann net, ich heer jo net gut. Geht Ihr hin? Aso e scheene Gruß an die ganzi Banda, saat nor, de Vedder Naz hot gsaat: E scheene Gruß! Ich hun jo meins gemach, ich war gere bei dr Musik, ja!

(Aufgezeichnet von Walther Konschitzky)
.

aus NEUER WEG, Bukarest, 19. August 1978