"Man
merkt auch in Ingolstadt, daß der Kreis unserer Landsleute immer größer
wird", hot die Frau Graf in der BANATER POST vum 5. Februar 1991
gschrieb. Ich waaß net, ob merr des in ganz Deitschland speert; in Ingolstadt
hot des sich uf jede Fall schun bemerkbar gemach, daß fast "all"
schun do sin. Pst, Finger vor's Maul, un net weider plaudre iwer des, was ich
eich korz verzehle werr.
Uf'm
Silvesterbaal in Ingolstadt war's zimlich voll. Do is es beim Tanze halt e bissje
eng zugang. Ja mei, in der Tramvai in Temeswar war's doch aah als e bissje
knapp, un in de Reihe am Fleisch is doch aah genuch gedrickt un gstoß wor.
Mensche, die wu im Banat gelebt un iwerlebt hun, därft e fremder Eelbo in de
eigne Rippe während 'me Zeppelpolke doch kaum was ausmache.
Denkste!
De Toni, e gstandnes Neiarader Mannsbild, is am eerschte Neijohrstach per
Telefon aus'm Schlof gholl wor. Des war weider net schlimm, weil des an dem Tach
de meiste Leit so geht. Wie er awwer an de Apparat kumm is, hot sei Weib de
Heerer schun in der Hand ghatt un hot, ganz blaich im Gsicht, ka Wort
rausgebrung. De Toni hot er des Ding abghol un sich heeflich vorgstellt. Do is
es uf der anner Seit vun der Leitung schun mit ganz massive Beschimpfunge un
Drohunge lossgang. De Toni hätt ehm, dem unheimliche Onrufer, beim Tanze uf'm
Silvesterbaal die Rippe kontrolleert. Normal hätt er, der geheimnisvoll Onrufer,
die Miliz - jo, die Miliz - rufe misse, un de Toni aus'm Saal werfe losse. Er,
der bees Onrufer, werd em Toni uf jede Fall beweise, daß er, de Toni, bei der
Landsmannschaft, wu er aah im Vorstand is, nix meh zu suche hot. Des war forr de
Toni e bissje vill. Wie er dee annre, dee Beleidichte, gfrot hot, wer er iwerhaupt
is, hot der abgeleht. Genauso wie merr heit noch net waaß, wer die ware, die wu
in Temewar an Weihnachte '89 uf die Leit gschoss hun, genauso wenich waaß de
Toni, wer der Inkognito-Onrufer war, un er beteiert heit noch, daß er sich net
erinnre kann, in der Silvesternacht mit seim Eelbo in fremde Rippe rumgsucht zu
hun.
Em
Toni sei Schuld odder sei Unschuld sin aah gar net so wichtich. Wichtich is, mer
wisse jetz, daß se wirklich schun "all" do sin, aah die, die wu
drunne so e bissje mit der Securitate odder der Miliz simpatiseert hun, un dee
ehre Methode anscheinend aah do onwenne wolle. De Toni brauch sich jetz ka
Koppweh mache. Bei uns in Deitschland is alles gsetzlich geregelt, aah's Tanze.
In der Urteilsbegründung 12 U 12/90 vum Landgericht Osnabrück steht nämlich
schwarz uf weiß: "Wer auf einer Party mit großem Temperament und
Körpereinsatz tanzt und dabei einen mitfeiernden Gast zu Boden stößt, muß
ihm für die dabei erlittenen Schmerzen keine Entschädigung zahlen."
Sie sin schunn fast "all" do. Wu vill sin, kummt vill vor. Logo, meecht
mei integreerter Sohn jetz son. Awwer es is leider so, daß norr die unangenehme
"Vorkommnisse" Staab ufwirble.
Die
Schwowe in un um Ingolstadt halle ehre Veranstaltunge seit meh wie zehn (10)
Johr im Sportheim Etting ab. Etting is forr die Schwowe so etwas wie drunne es
Wertshaus odder in der sozialistisch Zeit es Kamin (Kulturhaus) war. Ob's Saal
voll odder norr halwer voll war, hot nie e Roll gspillt. In Etting is es immer
scheen gewen un nie nicks passeert; bis jetz, desjohr am Trachtebaal, do ware
morjets, korz noh Schluß, alle Postkästcher im Haus demoleert.
Nateerlich
hot de Sportheimleiter sich glei an de Metzger
Hans, de Chef vun de Schwowe, gewend un "die
Schwowe" massiv beschullicht. Weil de Metzger Hans awwer iwerhaupt
net uf's Maul gfall is, kann merr sich vorstelle, wie do die Funke gfloo sin. De
Schwoweverein hot nateerlich de Schade gutmache misse und de Krach is noch net
rum. Es werd sogar iwers Umziehe in e annres Lokal spekuleert. Die wirklich
Schulliche kennt merr bis heit net, un es wär aah zum Staune, wann die sich
melle meechte.
Sie
sin schunn fast "all" do. Leider scheine aah die Exemplare dabei zu
sin, die wu net in ehre schwowische Därfer groß wor sin, sondern in irgend oom
Internat e sozialistischi Erziehung kriet hun. Es is jo dorchaus meeglich, daß
es unner uns jetz e paar vun dee "omul-nou-Typen" gebt. Dee fallt's
jetz schwer, in ooner normaler Welt normal unner normale Mensche zu lewe. Es
gebt freilich sehr, sehr wenich vun dee seltene Exemplare. Awwer ooner vun dee
is schun zu vill, weil er es ganze "Erscheinungsbild" vun de Schwowe
in Deitschland verphuscht.
Mer
perseenlich wär's jo aah liewer, wann die Leit, vun dee wu die Frau Graf
schreibt, meh in der Öffentlichkeit uffalle meechte. Awwer die Spillregle sin
im Lewe nun mol annerscht: Immer die falle uf, vun dee wu merr am liebste
wegschaue meecht.
Uns
bleibt net meh iwrich, wie des zu mache, was alle onstänniche Deitsche no em
Kriech gemach hun un was aah heit noch sehr modern is:
"Vergangenheitsbewältigung".
Des
do is so e Versuch uf schwowisch. Awwer es bleibt dabei: Streng vertraulich,
norr unner uns.
Eier
Potche Toni
aus BANATER POST, München,
20. April 1991
gekärzt erschien aah in der
BANATER ZEITUNG / PIPATSCH,
Keine Kommentare:
Kommentar veröffentlichen